漫畫《老夫子》陪伴住唔少香港人成長，為咗紀念去年逝世嘅第一代作者「老王澤」王家禧，拍賣行蘇富比事隔四年再度舉辦原稿展售會，展出包括第二期漫畫封面《搖滾老夫子》原稿、早年嘅四格漫畫原稿等作品，相信係王家禧手稿最後一次大型公開展售，並會由今日起至25號期間喺金鐘蘇富比藝術空間公開展出。
第二期封面叫價40萬
《老夫子》喺1964年正式推出單行本，但第二代作者、正牌王澤話，第一期嘅封面一早已經唔見咗，惟有第二期封面一直珍藏到𠵱家。今次展售會同時都會展出佢自己創作嘅壓克力彩畫「弦外之音」──影子系列，希望可以透過新舊作品嘅對話，緬懷爸爸一生嘅成就。
同以往嘅展售會即場叫價唔同，《搖滾老夫子》月初起已經喺網上開始拍賣，今日係最後一日，有興趣嘅不妨上香港蘇富比參與競投。截至噚日下晝6點鐘，叫價已去到40萬港紙啦。