周二晚歐聯第三圈外圍賽首回合，葡萄牙同荷蘭兩支勁旅分途出擊，結果命運各異。賓菲加成功喺主場以1:0小勝費倫巴治，但阿積士就喺領先兩球之下，最終被標準列治逼和。賓菲加唯一嘅入球喺69分鐘射入，當時前鋒法蘭高施維喺禁區內拎到波後左腳射門，雖然對手門將拍到個波，但都照入網，最終一箭定江山。而阿積士作客比利時嘅標準列治，有老將亨特拉爾同新兵杜辛泰迪治各建一功，半場已經領先對手兩球。不過標準列治靠卡斯拉干沙利斯67分鐘嘅入球追近，補時階段更博到12碼，由前鋒列拿特艾蒙操刀得手，最終賽和2:2。而次回合將會喺8月14日上演，到時手執兩個作客入球嘅阿積士會喺阿姆斯特丹主場再戰標準列治。