一部由藍田廣田邨總站開去牛頭角嘅九巴14B線，噚日朝早9點幾由藍田總站開去第二個站油塘高超道高俊苑站上落客嗰陣，企喺對面等巴士嘅讀者譚小姐突然聽到有人大嗌：「有煙呀，落車呀！」譚小姐隨即見到巴士車尾冒煙，然後起火。佢話車長嘅應變都好快，即刻熄匙同埋疏散巴士上面20幾個乘客，有啲乘客繼續喺巴士站等下一班車嚟，而巴士車尾嘅火勢亦都好快受控。
巴士車長曾經攞個滅火筒嘗試救火，咁啱嗰個時候有架警車經過，有人截停警車求助。譚小姐等到巴士上車之後，仲見到巴士車尾有微弱火光，佢話當時見到巴士車尾着火都有啲驚，驚會爆炸。冇幾耐消防車到場，消防員好快將火救熄，初步懷疑巴士機件故障引致起火。事件中冇人受傷。九巴發言人話已經將架巴士拖返車廠修理，冒煙嘅原因有待檢查。