兩個球壇名宿史高斯同古華特禮拜三分別訪港，其中曼聯名宿史高斯出席一間本地初創企業搞嘅足球活動，提及母會曼聯今屆喺轉會市場冇乜重磅收購，領隊摩連奴成日牢騷王上身，但史高斯認為摩佬呢幾年使咗唔少錢，係時候要交貨啦。
讚費特熱身賽表現佳
曼聯季前買入巴西國腳中場費特洛迪古斯之外，只從波圖羅致19歲後衞達洛治，以及從史篤城簽入後備門將李爾格蘭，領隊摩連奴更怨高層唔肯增兵，但史高斯就話：「球隊已經有唔少好球員喺陣中，我認為佢唔能夠每季都話球隊仍需要五、六名球員，佢已經使咗唔少錢。」史高斯仲話費特近幾場熱身賽表現唔錯，相信佢可增強曼聯嘅實力，但都認同衞冕嘅曼城實力出眾，因此外界今季普遍對曼聯冇太大期望。
除咗買人唔算多，連陣中主力保羅普巴都好大機會轉投巴塞隆拿，前輩史高斯就話普巴根本唔適合踢巴塞：「我唔知普巴同摩連奴嘅關係，但我認為佢嘅風格唔適合巴塞。」史高斯都有讚普巴天賦極佳，希望佢留喺紅魔爭標：「我希望最好嘅球員都留喺曼聯，佢若能踢出喺世盃嘅表現，曼聯就有機會奪標。」
摩連奴過往喺波圖、車路士、國際米蘭同皇家馬德里等都唔會教多過三季，史高斯笑言唔清楚今年會唔會再現「三年魔咒」：「假如球隊表現欠佳，唔能夠成為爭標分子，咁佢（摩連奴）離開都唔奇。」雖然摩連奴經常被批評大打沉悶足球，但曾喺名帥費格遜麾下同「七小福」並肩作戰嘅史高斯講笑咁講話，自己如果後生十年兼未掛靴的話，同樣願意為𠵱家嘅曼聯效力：「每個時期嘅曼聯都有唔同踢法，現時踢法唔似以前華麗，但都係一個帶領球隊取勝嘅方法。」
古華特為「現在台」助威
至於荷蘭名宿古華特就去咗「現在台」搞嘅節目巡禮，公佈下季獨攬五大歐洲頂級足球聯賽，仲有美職聯、澳職聯等，足球以外，美網、世界桌球公開賽、中國羽毛球公開賽等體育大賽都會播。曾效力巴塞嘅古華特指西甲群雄大事擴軍，不過對巴塞非常有信心；佢亦大讚英超曼城喺哥迪奧拿帶領下表現穩定。講到佢個仔，19歲嘅祖斯甸古華特啱啱喺阿積士轉會羅馬，寄語佢要繼續努力：「我好高興個仔有咁嘅表現，來季我會支持羅馬嘅比賽，佢有潛力，不過長路漫漫，要再走好多公里路先達頂級水平。」