兩名鍵盤戰士唔知係唔係喺網上討論區傾唔埋欄，索性約出嚟三口六面講清楚，點知講到出手打交，拳拳到肉，至少打足10分鐘！讀者蔡先生同《蘋果》講，前日夜晚9點幾見到一個着白色短袖T恤牛仔褲嘅男人，同另一個着白色背心短褲踢拖嘅男人，喺小西灣邨巴士總站對開打交，其間互有拉扯推撞，兩個人身邊有一個戴黑色口罩、着裙嘅女人全程用手機影低成個過程。
街坊：大家都係人
同蔡先生一齊嘅小妹妹見到咁嘅情景，嚇到尖叫大喊，叫佢唔好睇。旁邊亦有街坊大嗌傷到人唔好㗎嘛，叫佢哋唔好打。拳頭交開頭係背心男佔上風，仲除拖鞋好似打擂台一副戰鬥格咁，但係之後俾對方用電筒扑佢個頭，扑到爆缸，背心一笪血迹。佢哋一路打，引嚟大批街坊圍觀，其間有人大叫：「算啦，大家都係人嚟㗎，唔好錯手打親呀！」冇幾耐終於有個熱心男街坊走埋去隔開佢哋：「好嘞，大家退一步，海闊天空。」
白色T恤男人本來想同拍片個女人離場，但係背心男一路打電話一路阻止佢哋，兩個人又再拉扯糾纏跌落地，白T恤男人手上嘅電筒都飛跌落地。兩個人企返起身，背心男走入附近一間便利店，拎住個玻璃樽行出嚟，但係對方同女伴已經走咗。
警方接報到場調查，44歲背心男頭部受傷送院治理。據了解，雙方喺網上一個貓狗討論區疑意見不合，相約出嚟見面，點知搞出流血事件。警方將案列作襲擊傷人處理，追緝緊一男一女歸案。
事後網上有花生友仲講風涼話贈興，話兩人勁過淨係識得匿埋打字嘅網民，「講明隻揪，你擸架生！」、「真漢子」。喂喂，大家講吓道理啦，咁樣就叫真漢子？