立法會九龍西補選11月舉行，自從食物及衞生局前局長高永文明言唔會代建制出戰，就傳出其政助陳凱欣會代建制披甲，更加有報道話建制派已拍板由陳凱欣做代表。一直以來都對九西補選虎視眈眈嘅自由黨李梓敬（圖），噚日喺facebook話自己唔會參選，力撐陳凱欣出戰。
李梓敬喺facebook話，3.11補選時因為幫鄭泳舜拍片認識陳凱欣，形容陳凱欣「有豐富嘅政治人脈，對政策同政治嘅深入認識，亦都有一顆關心別人嘅心」，直言「凱欣確實是值得支持的人選」，讚到天上有地下無咁！佢坦言好想代表建制出戰，但係大局面前，佢決定支持陳凱欣出選，仲話希望凱欣可以為建制爭取關鍵一席。雖然當事人到今日都未正式表態，但連日來全國政協委員張志剛、新民黨主席葉劉淑儀、財經事務及庫務局前局長陳家強都相繼點名力撐，睇怕陳凱欣出選機會相當高。