新一季英超今個禮拜五就會開鑼，不過車路士門將泰拔高圖爾斯就仲未返去球會報到，令外界猜測呢位比利時國腳會唔會一如傳聞所指轉投皇家馬德里，唔再返倫敦？
高圖爾斯原定喺星期一就要返車路士報到，不過到𠵱家都未見影，其實佢由上個月開始就一直喺西班牙特內里費度假，當地一間超級市場星期日仲喺twitter上載咗高圖爾斯同超市員工嘅合照，間接證實佢仲喺呢個西班牙小島。
其實早喺上季尾，已經傳出皇馬希望羅致高圖爾斯嘅消息，有英國傳媒仲話，特內里費距離首都馬德里只有2,000公里，可能高圖爾斯已經等緊皇馬代表去搵佢傾轉會㖭。
車仔急買畢蘭特救亡
雖然高圖爾斯會唔會走仲係未知之數，不過車路士據聞就已經做定最壞打算，據英國《天空體育》指，車仔準備收購今季降班到英冠嘅史篤城門將畢蘭特，估計呢位英格蘭國腳嘅身價約值3,000萬鎊（約3.05億港元）。由於今季嘅英超轉會窗將會喺香港時間星期四夜晚12點關閉，消息仲話車仔打算速戰速決，唔講價即買㖭。
不過如果高圖爾斯真係有心上「馬」就真係唔好拖太耐喇，事關近年英超都出現過因為「嘆慢板」搞到走唔切嘅實例，喺2015年皇馬打算收購曼聯門將迪基亞，但最後一刻就因為有關文件趕唔切交，最終遲咗一分鐘而未能成事，相信皇馬都唔希望歷史重演。
韋利安憎干地冧沙利
車仔今季留唔留得住高圖爾斯同夏薩特仲有待觀察，不過隊中嘅巴西中場韋利安就率先表態話唔會落「車」。韋利安近日受訪就透露，自己同前任領隊干地的確係唔啱傾，話對方係一個好難合作嘅人，不過季尾嘅「Emoji風波」韋利安就話唔係佢特登遮住干地，而係佢個女手多搞成咁喎，又會咁啱嘅？
韋利安仲承認巴塞隆拿之前正式出過價想買佢，不過就話自己好鍾意車路士同埋新領隊沙利，所以冇諗過走，睇嚟巴塞同曼聯想買韋利安都唔係咁易。