即將踏入13歲嘅大熊貓盈盈疑似有喜！海洋公園公佈由7月下旬起，盈盈出現一些包括食慾減少及休息時間增加等典型妊娠症狀，其實海洋公園喺今年4月交配季節，盈盈同雄性大熊貓樂樂曾嘗試自然交配，園方亦為盈盈進行人工授精，由於大熊貓妊娠期由72到324天不等，上述症狀有可能係假懷孕，而盈盈係2015年曾成功受孕，但不幸在臨分娩前流產。
至於已成為全球最長壽雄性大熊貓嘅安安，今個月踏入32歲，相等人類95歲高齡，不過佢5月時候因為青光眼影響，出現晶狀體半脫位，有可能睇唔到嘢，所以喺6月初海洋公園為安安進行咗青光眼手術，𠵱家正進行術後護理，而海洋公園日前仲整咗個冰蛋糕，為3隻大熊貓慶祝生日㖭。