前特首梁振英呢排係咁砌FCC同民族黨，似乎越戰越勇，令到唔少政圈中人記起，早前流傳梁振英有意喺下屆特首選舉捲土重來，再選多次特首，而向來積極監察689狀況嘅自由黨榮譽主席田北俊，前日忍唔住喺facebook度向各界發放溫馨提示㖭。
高調出招以示娥特打獨不力
田北俊前日喺facebook貼咗上述689向FCC發炮嘅報道，仲留言話：「睇路呀！689復出指日可待！」似乎田少都覺得689近來連串嘅動作，唔係單單刷存在感咁簡單！
唔少網民聽到田少咁講都好驚，網民Sindy Chan就留言：「嘩！田少咪嚇人，心血少D會嚇死㗎！」Ping Cheung就希望：「惡夢不要重演！689快消失！」亦有民主派人士話，689當日能夠喺民望低迷下，仍然獲得國家主席習近平力撐，同佢一手挑起「港獨」議題，再出全力打「港獨」有關，只係689估唔到有習總「疾風知勁草」五字照住，最後都係敵唔過包括建制、商界各方發功拉佢下馬，咁佢自然酸溜溜不是味兒，𠵱家佢又故技重施，又再借「港獨」議題「大展拳腳」，一面可以顯示特首林鄭打港獨不力，又可以向中央顯示佢炮打「港獨」勇往直前嘅決心，隨時可以博到中央又睇中佢，翻閹再做特首！