大熱天時，前日仲有酷熱天氣警告，放工逼巴士冇位坐都唔緊要，但車廂一啲風都冇好似焗桑拿咁，都咪話唔辛苦！李先生前日傍晚6點幾放工，喺新蒲崗搭277P線返粉嶺，當時好多乘客，架車幾乎爆棚，佢上到車都要企喺近車頭位置，一上車已經覺得好焗，抬頭望吓發現頭頂有5個風口位都被黑色膠紙封住。
車長位疑似有冷氣
𠵱條線係特別班次，服務時間係逢星期一至五下晝5點半到夜晚7點，每半個鐘一班車，所以通常都好逼人，大家都表現得唔係幾舒服，有人用手上嘅報紙撥涼，有人開住手提風扇仔，李先生話車頭一滴風都冇，佢係咁標汗。
但車長似乎冇受影響，李先生話見到佢啲頭髮有風吹郁，估計車長位係有冷氣。其他乘客你眼望我眼，但係就冇人開聲問車長點解會咁焗。結果李先生捱咗45分鐘去到粉嶺落車。《蘋果》就呢件事問過九巴，九巴發言人話，經過檢查之後，證實有關巴士嘅空調系統運作良好。但係九巴會提醒車長喺開車之前，加強留意同檢查巴士上嘅設施係唔係一切正常。