色慾男女係唔係唔識驚嘅呢？之前被揭發喺公眾地方打野戰嘅男女，都要承受法律後果，包括今年5月一對男女喺觀塘海濱公園交歡俾人發現報警，兩人原本被控告作出有違公德行為罪，上星期五控方撤控改以簽保守行為處理，兩人以1,000蚊簽保守行為1年。
俾人見到就算犯法
成為一時熱話嘅仲有2015年4月，兩名內地來港嘅男女大學生，喺何文田佛光街街頭性交，最後女方認罪獲判感化，男方亦承認作出有違公德行為罪，被判社會服務令60小時。另外今年6月，兩名男子喺上環一個單位內靠窗位置上演愛情動作真人騷，吸引街上途人圍觀，大狀陸偉雄話事發單位雖然係私人地方，但係公眾可見嘅地方，有機會觸犯《刑事罪行條例》第200章第148條「公眾地方的猥褻行為」，最高可處罰款1,000蚊及監禁6個月。
陸大狀解釋，作出有違公德行為罪屬於普通法，主要涵蓋的違法行為包括喺公眾地方裸露身體、進行性行為或與性有關嘅活動，最高刑罰可判監7年，唐樓天台一般屬公眾地方，所以前日勿地臣街天台男女嘅行為，亦有機會被控此罪。