前特首梁振英呢排係咁追住香港外國記者會（FCC）請陳浩天演講單嘢砌，唔少政界中人都估梁振英為乜咬住FCC唔放，亦係民主派人士茶餘飯後話題，有民主派好事之徒話，每逢有民主派拎UGL案講，唔使幾耐梁振英就會借機打港獨又或出律師信，總之令UGL案呢個題唔好拖長。
將演講與黑社會相提並論
又有民主派中人發現，梁振英砌FCC其中一篇facebook帖文，入面提到FCC請乜人講乜題目，唔可以隨心所欲，又反問FCC會唔會請黑社會頭目講黑社會主張？佢話梁振英呢句說話令佢記起當日梁振英選特首，佢啲助選團成員去小桃園飯局，如果梁振英睇得呢啲嘢咁緊，咁點解佢自己選特首，又畀啲下屬去小桃園飯局，事後又可以覺得只係食餐飯吹吓水咁，所以完全冇問題？