前晚星期日夜晚8點10分，龐先生同太太喺銅鑼灣希慎廣場食完飯離開，突然之間聽到「砰」一下好大聲，佢周圍望，見到對面崇光百貨外面有新巴同電車相撞，電車左邊車頭仲好似開罐頭咁揭起咗，於是幫手報警。
猶如開罐頭
綜合警方、巴士公司及電車公司嘅資料顯示，當時一部往小西灣藍灣半島嘅新巴8P線，同埋一部往筲箕灣嘅新巴2X線，順序停喺崇光百貨對開軒尼詩道東行嘅巴士站。2X線33歲姓謝車長開車駛離巴士站嗰陣，巴士左邊車身撞到前面嘅8P線巴士，姓謝車長打算將巴士停埋一邊等候公司嘅督察到場處理，點知倒車再駛前嗰陣，車尾又撞到停喺後面嘅一部編號104號電車，電車車頭仲好似開罐頭咁揭起咗，成地都係玻璃碎。
結果，2X巴士有兩個乘客手指同臉受輕傷，電車上一個乘客亦撞親手，3個人送院敷治。電車上其餘乘客全部離開車廂，電車服務受影響約20分鐘。新巴發言人話公司會配合警方調查事件。電車公司發言人就話有關意外跟進事宜，會交由保險同有關部門負責，作出合適嘅安排。