曼聯小將拉舒福特喺周日晚對拜仁慕尼黑場熱身賽唔再着19號，改為10號（圖），而佢今季都會做10號仔，成為自伊巴謙莫域去年12月最後一次為球隊上陣後，首位着上曼聯10號波衫嘅球員。雖然7號至係曼聯最具代表性嘅號碼，但10號終究有其意義，此前曼聯嘅10號仔，就包括朗尼、曉士、舒寧咸同雲尼斯達萊等名將。
曼聯領隊摩連奴喺對拜仁嘅賽後話，畀拉舒福特得到10號球衣，係對佢過去兩年半以來迅速成長嘅獎勵。摩佬話：「拉舒福特一直都想得到呢件波衫，佢非常尊敬朗尼，之後伊巴謙莫域要咗，佢一直都在等待呢個機會。」今次已經係拉舒福特升上曼聯一隊後，第二次換球衣號碼，此前一次係2016年由39號改成19號。