八方相當年：周炫瑋拔根勁划艇醒 - 李八方

上屆區選成功打大佬，喺大埔寶雅拔黃容根嘅新同盟周炫瑋（Paul），細細已經住喺大埔，現年30歲嘅佢小學讀大埔崇德黃建常紀念學校，佢話成績ok，「阿媽督促得好勁，佢虎虎哋，考得唔好會罰唔准睇電視，所以都會自律讀書。」升上大埔恩主教書院後發現天外有天，「啲同學太勁」，自言成績只屬中游，而佢一直愛文科，Science相關科目唔算掂，但除咗中史，同時又愛數學。
查實佢中四嘅時候都唔只顧讀書，參加過近一年嘅划艇會，試過去城門河集訓，但中五要專注會考，所以放棄呢項至愛。最終會考中史攞A，數學則係B，果然係有興趣嘅科目成績好啲，以17分原校升中六，繼續活躍於課外活動，例如校內嘅班際足球賽攞過冠軍。高考成績則麻麻，考入咗嶺大讀哲學，其間再重拾划艇興趣。

曾任職NGO　對社工感興趣

2010年嶺大畢業後曾經喺NGO任職，其間覺得自己都幾適合做社工，2013年報讀中大社工系碩士，同學包括2011年新晉議員、新同盟嘅鍾錦麟，傾落對方發現阿Paul對政策都有興趣，新同盟就向佢招手，最終2014年入黨，喺大埔區深耕細作。