新一季英超周五開鑼，當日打頭陣迎戰李斯特城嘅曼聯，喺周日進行最後一場熱身賽，作客拜仁慕尼黑。紅魔今夏冇乜買人，加上唔少主力未歸隊，喺熱身賽成績認真麻麻，結果又輸一場0:1不敵拜仁。領隊摩連奴賽後嗌晒救命，暗寸高層增兵不力之餘，亦呼籲班主力提早歸隊。
輸畀拜仁仲傷埋兩件
紅魔鬼今場仍有保羅普巴同盧卡古等缺陣，進攻上冇乜威脅，控球率得28%，全場只有一次攻門兼唔中目標。拜仁喺下半場打破悶局，查維馬天尼斯喺59分鐘接應堤亞高艾簡達拿開出嘅角球頂入，助拜仁以1:0贏波。曼聯喺今夏踢咗六場熱身賽，只係贏得一場（見附表），成績相當不濟。曼聯唔齊腳之餘，今場更有主力艾歷拜利同安達靴里拉喺下半場先後受傷退下火線，暫時未知趕唔趕得切喺周五嘅英超揭幕戰候命。
紅魔季前增兵情況唔算積極，先由波圖簽嚟嘅後衞達洛特一直傷緊、之後先後有巴西中場費特洛迪古斯同埋門將李爾格蘭，有傳過想簽嘅哈利馬古尼、耶利文拿、艾達韋列特、韋利安甚至哈利卡尼全部都冇下文，其中韋利安啱啱表態留喺車仔，更加冇行，難怪摩佬賽後又向球會高層施壓，警告如果喺周四英超轉會窗死線前唔再增兵，新季肯定會非常難踢：「球會嘅行政總監知道我想要乜嘢球員，我仲有三兩日可以等吓會發生咩事情。我哋嘅競爭對手都非常強，隊隊都已經有好強嘅陣容，或者好似利物浦嘅係咁使錢，乜都買。」
普巴、費蘭尼急趕歸隊
曼聯今場有域陀連迪路夫、拉舒福特同埋菲爾鍾斯歸隊，不過仲有部份球員未返嚟。摩佬之前曾經講過，話一班踢到世盃較後階段嘅球員，都唔會喺首場英超擔正，但咁嘅形勢佢似乎想反口，希望仍然放緊假嘅球員，提早歸隊幫球隊一把。
盧卡古喺上周五已經報到同開操，兩位中場保羅普巴同費蘭尼亦都喺周一返嚟。摩佬話：「我哋要喺周五進行首場英超真係不幸，只得幾日備戰係唔足夠。我哋會以手上擁有嘅球員出戰；睇吓其餘球員可唔可以幫幫手，踢到20至25分鐘都好。」