噚日係全民運動日，政務司司長張建宗發表網誌講體育，大講今屆政府點樣發展體育不遺餘力，但最諷刺係，剛剛喺第12屆世界跳繩錦標賽入面，包辦男子組15歲或以上組別團體及個人項目總成績三甲嘅香港跳繩代表隊，竟然搞到要喺facebook專頁發起眾籌計劃自救！
注資60億 只益精英運動員
其實香港跳繩代表隊近年出賽成績相當唔錯，除咗喺過去嘅第12屆世界跳繩錦標賽中，包辦男子組15歲或以上組別團體及個人項目總成績三甲，勇奪88面獎牌外，以往喺各項國際賽事亦取得極佳成績，政府亦曾出新聞稿讚揚及恭賀，不過跳繩代表隊原來一直冇政府資助，連香港隊出戰於上海舉行的世錦賽，139名運動員同工作人員，各自要自付13,750元作為經費。所以香港跳繩總會上個月自行喺facebook專頁發起眾籌計劃自救，以90萬元經費為目標，希望透過眾籌，作為支持129個運動員參賽同日後發展之用，不過暫時只籌得約25萬元。
香港跳繩代表隊連搵90萬都咁辛苦，但張建宗喺網誌話，政府每年億億聲掟錢推動體育「精英化」，單係「精英運動員發展基金」就注資60億元，畀推廣普及體育嘅經常開支又有48億元，真係一個零頭都夠香港跳繩代表隊用幾年，但點解政府畀咁多錢搞體育，但幫香港拎咁多獎嘅跳繩代表隊，就一毫子政府資助都冇呢？
李八方