呢幾年大事增兵嘅曼聯，近期屢傳領隊摩連奴同隊中主力關係破裂，其中兩位法國球星保羅普巴同安東尼馬迪爾更被指有可能會離開奧脫福，英超仲未開鑼，紅魔就可能先要應付球隊嘅「內戰」。
25歲嘅法國中場保羅普巴自2016年回歸曼聯後，大部份時間表現都喺水準以下而備受抨擊，近日又再傳出佢同摩連奴關係漸趨惡劣。據意大利《米蘭體育報》報道，摩連奴因為擔心季初兵力不足，早前要求一眾仍然放緊假嘅球員提早歸隊，盧卡古、拉舒福特同連格等就乖乖哋聽話，惟獨喺美國度假嘅普巴就繼續我行我素，堅持要放埋個假先。
想返祖記與C朗雙劍合璧
據悉摩連奴因為咁而不滿普巴，意甲嘅祖雲達斯同時亦希望普巴回巢，所以就有傳祖記會借今次機會誘勸普巴回歸，希望佢可以喺今季同新加盟的基斯坦奴朗拿度一齊協助球隊衝擊歐聯。雖然祖雲達斯已經借走希古恩，又盛傳會再賣走比真歷同魯加尼，騰出財政空間，不過普巴現時嘅定價應該會高於當年轉投曼聯嘅8,900萬鎊，要簽番都唔係咁易。
除咗普巴之外，隨住翼鋒安東尼馬迪爾與領隊摩連奴關係惡化，呢位法國球星被賣走亦似乎只係時間問題。不過馬迪爾離隊一事成個夏天都只聞樓梯響，喺英超轉會窗完結前可唔可以與摩佬「分手」仲係未知之數。
馬迪爾韋利安或互換東家
英國《鏡報》上周六就傳出，摩連奴希望用馬迪爾交換車路士時代嘅愛將韋利安，報道指兩位球員嘅叫價都係7,500萬鎊，而且兩人都有意離開現時效力嘅球會，所以呢宗交易都咪話冇可能。不過29歲嘅韋利安憑今屆世界盃出色嘅表現，亦吸引到巴塞隆拿同祖雲達斯等豪門注意，紅魔要羅致韋利安似乎唔係咁簡單。
曼聯近期嘅轉會新聞都唔係清一色「有出冇入」，據英國傳媒消息指，紅魔同熱刺就29歲中堅艾達韋列特嘅轉會談判取得突破，熱刺方面由於唔想下一季完結後畀其他球會用低價搶走呢位比利時國腳，所以同意接受曼聯嘅6,000萬鎊報價，更有傳呢單交易將會喺日內完成。