屋企有得玩層層叠遊戲，原來巴士車廂都可以層層叠，不過一啲唔好玩，而且仲非常牙煙。任職旅遊業嘅容小姐，因工作關係經常要搭來往深圳灣口岸同屯門的城巴B3X路線，佢經常發現好多內地旅客，將啲大大個嘅行李篋塞上巴士，啲行李多到好似玩層層叠咁，塞滿咗原本用嚟畀輪椅擺放嘅車箱位置，甚至阻塞車廂通道。
向城巴投訴冇回覆
由於情況實在太誇張，佢多次向巴士公司投訴，一直冇得到正面回覆，連車長都唔理，照畀啲乘客攞咁多行李上車，咁啱上周六早上九點搭車，又見到問題依舊未解決，所以嬲得滯就向《蘋果》爆相，有圖為證，希望巴士公司嚴肅處理喎。從相片可見，旅客好似玩緊俄羅斯方塊咁，一層又一層叠上去，結果叠到五層高，幾乎係一個成人高度，行李之後更伸延至車門位置，睇怕乘客落車都有啲難度。
城巴公司發言人回覆查詢就話，公司會了解事件，提醒乘客如果帶行李上巴士，要注意唔好阻塞車廂通道，仲話車長亦會盡量勸喻乘客咁話。