噚日康文署所有康體設施都開放畀市民使用。特首林鄭月娥、民政事務局局長劉江華就孖住去到青衣一個體育館與民同樂。一身運動裝束嘅娥特，梗係要落場show下quali喇，喺草地滾球嘅環節，佢同劉江華分隊比賽，最終劉江華嗰隊靠精英運動員幫手，勝出比賽。雖然輸咗波，但娥特都仲好好笑容，乜佢唔係樣樣都要第一，考二都會喊㗎咩？而喺早前嘅「香港殘奧日」，林鄭都試過拍住劉江華同體院主席林大輝組隊玩滾球，最終KO真劉華。
籲支持港將戰亞運
除咗滾波，娥特同劉江華分別參觀咗幾個項目，其中喺健體操環節，佢哋仲喺體適能教練指導下，同姨姨一齊做水樽操，都係雙手將水樽舉上舉落咁啦，娥特似乎做得相當輕鬆、無咩難度，而姨姨見有得同特首一齊運動，當然好興奮。其餘環節，娥特都主要係主持吓比賽開鑼同埋觀賽，佢事後見記者時就話，按過去經驗噚日應該總共會有20萬人，可以用到康文署嘅設施，佢又呼籲市民支持香港運動員參與8月亞運會。