上周六中超發生疑似種族歧視風波，喺上海申花1:1作客戰和長春亞泰嘅比賽入面，曾經踢過英超嘅塞內加爾前鋒丹巴巴亞，懷疑被對手以種族歧視嘅說話侮辱，雙方發生激烈衝突，據稱巴亞賽後喺更衣室心情仍然未能平伏，申花就表示會將種族歧視呢件事匯報上中國足協。當比賽進行到77分鐘時，丹巴巴亞先同亞泰中場張力嘈交，繼而捉住對手衫領，後來喺雙方球員力勸之下，衝突先未有升溫。不過，丹巴巴亞離開球場時仲係好嬲，據球會表示係因為丹巴巴亞係咁聽到張力喺佢身邊講「You Black（你這黑人）」呢句，先挑起呢位塞內加爾前鋒嘅怒火。
申花賽後就喺官方微博上載咗張海報，以「Say No To Racism」力撐呢位前鋒，佢哋亦表示已經第一時間向球證匯報事件，並會整理材料後上訴至中國足協。