舊年有傳媒報道過，有位香港人因吹得一手好嘅單簧管，加上一啲際遇而成為英國御林軍，據講人工少香港警察少少，但勝在福利好，尤其住屋方面。講咁耐，重點係要有BNO先至有資格去考，咁冇BNO嘅香港人點算？等八方介紹番，就係香港警察請緊嘅樂隊隊員喇。
𠵱家警務處請緊警員（專門人員），仲註明係樂隊隊員，除咗會考5科合格等一般要求，最重要係精通木管樂器、銅管樂器、敲擊樂器，兼且要有英國皇家音樂學院8級或以上，或者英國風笛學院頒發3級以上嘅蘇格蘭風笛或蘇格蘭鼓證書。
與一般警員同酬唔同職
職責方面，同一般警員唔同，呢個樂隊隊員主要係做樂隊相關嘅事，譬如綵排、表演、檢查樂器、制服等，頂多要負責埋樂隊大樓嘅保安箒。而待遇又同番一般警員一樣，起薪點2.4萬幾蚊、頂薪3.4萬幾蚊。雖然要留港冇得入籍英國，但總算做番個好人，係咪先。