【本報訊】政府修例將有薪侍產假由3天增至5天，但勞方力爭加至7天，行政會議成員、自由黨主席張宇人接受電視台訪問時口出狂言，直指「侍產假一天都唔應該有」，更炮轟勞方無止境苛索：「你以為7日佢哋會收手咩？」職工盟主席吳敏兒斥張宇人與時代脫節，惡人先告狀，「你作為僱主又有停過剝削打工仔咩？」
記者︰盧文烈
無綫電視《新聞透視》前晚播出張宇人對增加侍產假有何意見的訪問，他在節目中暗批勞工界貪得無厭，「你以為7日佢哋會收手咩？7日就有14日，14日就有1個月、有1年，跟住就鬧你啲僱主無良，不停咁鬧，佢哋永無止境嘅苛索，佢哋唔會停喺一個位度」。張指之前政府提出3天侍產假他也反對，「好多人都鬧我無良」。68歲的他以自己年輕時為例，「當然我生晒喇，我老婆生晒喇，𠵱家講我啲女、新抱都生埋喇，你可以話我根本享受唔到，梗係乜都反對，我哋嘅年紀係點呢？以前我哋冇侍產假又點呢？係咪？以前我哋老婆冇產假又點呢？」
被轟醜化全港僱主
代表飲食界的張宇人更揚言，飲食業有數十個工種，如大廚和總廚都有侍產假的話，「我點請人頂佢哋個位？」他強調侍產假3天已應止步，反問支持增加侍產假的人士：「你夠膽嘅就嚟開食肆，用晒你嘅標準，無論工時、工資咩假期都好，全部擺晒入去，你賺到錢嘅話你同我講。」他又認為侍產假可令員工投入工作、提高生產力之說並不正確，「如果真係可以提高生產力，佢哋（投資者、管理層）唔通唔會去做咩？」
節目訪問曾任立法局、市政局、區議會「三料議員」的莫應帆，莫早於1997年已提出7天男士侍產假私人草案，但未能成功。他批評張宇人與時代脫節，「你（張）個腦筋都唔係跟時代去轉，仍然講返佢做老竇嗰個時候，落唔落後啲呀？講得難聽一啲，相隔一條深圳河嘅中國大陸都進步咗，都有侍產假啦，我哋成日覺得落後嘅都進步咗」。
政府早前已將5天侍產假條例草案交立法會審議，最快明年農曆新年前後落實。但包括工黨、民主黨及職工盟在內的團體卻表明會爭取將侍產假增至7天。職工盟主席吳敏兒昨發表聲明強烈譴責張宇人，批評張將任何勞工保障改善打為苛索，漠視香港勞法落後、永無止境刻薄勞工的實況，而有關言論更將全港僱主醜化。吳又斥張宇仁惡人先告狀，「你話我哋永無止境嘅苛索，唔會停喺一個位度，你呢類僱主喺剝削員工方面，又肯停喺一個位度咩？」本報昨再致電張宇人，但截稿前未獲覆。
張宇人過去不時發表惹火的言論，他力撐最低工資應定在時薪20元，言論被公眾批評刻薄，從此換來「廿蚊張」的稱號。
