曼聯名宿麥佳亞最近接受訪問,建議現任領隊摩連奴應該笑多啲,享受吓呢份「足球界最筍嘅工」。摩佬未開季已經怨言多多,又投訴球會唔增兵,又同安東尼馬迪爾等球員嗌晒交,外界已經傳佢逃唔過「三季必被炒」嘅魔咒。對於呢啲不利傳聞,麥佳亞就勸摩佬︰「你可以緊張,或者面露失望,但都要記住開心,要微笑或者大笑。利物浦就有個鍾意笑同受歡迎嘅領隊(高路普),就算你係曼聯球迷,都會感受到呢點。」