德甲班霸拜仁慕尼黑目前就喺巴伐利亞湖度假區度進行今年最後一個季前訓練營，不過法國翼鋒列貝利就非常黑仔，因為佢喺第一日嘅練習就已經發生意外，撞爆咗個頭。
據《ESPN》報道，拜仁喺禮拜四嘅公開操練足足吸引咗超過1,500個球迷到場支持，但係隊中王牌列貝利就喺一次攻門練習時撞到擺喺場外嘅一個門框，結果整親個頭。拜仁嘅隊醫立即衝出嚟幫列貝利包紮，好彩之後佢都可以自己行番出球場，入到更衣室接受進一步嘅診治。
佢事後喺個人Twitter度出post報平安︰「多謝大家關心，我已經好番好多喇，好快就可以復出。」一般相信列貝利只要休息番幾日，就可以恢復番練習，各位球迷唔使太擔心。