今季做領隊嘅名將林柏特，上周五喺英冠揭幕戰，帶領打比郡作客以2:1絕殺雷丁，攞到佢喺正式賽事教波嘅第一場勝仗，成個領隊生涯有個開門紅！
作為林柏特首戰，咁啱雷丁領隊就係前車路士助教基文特，佢哋2009至11年喺車仔合作過，開波前都嚟個擁抱先。主場嘅雷丁今場係先開紀錄一方，52分鐘保特華臣接應莫度巴路嘅傳中頭槌攻門得手，戰至60分鐘，打比郡中場莫特就用一腳靚絕嘅左腳射門，射破雷丁嘅前阿仙奴門將文路尼十指關。
最後一刻攻入反勝球
以為林柏特嘅第一場只能夠打和，去到補時四分鐘，打比嘅美臣賓納特右路傳中，前鋒湯馬士羅倫斯禁區內接應一頂，個波直飛龍門左上角入網，幫打比作客2:1反勝雷丁，40歲嘅林柏特好興奮咁同成班助教攬埋一舊，真係激動過以前踢波嗰陣。
林柏特就話呢種激情，係佢決定教波嘅原因：「我成個職業生涯都係永不放棄，唔會甘心輸波或者和波，反勝嘅感覺真係正，不過我當然唔希望每個禮拜都要反吸啦！」打比亦都有紐根特、列特利、卡臣、韋斯頓呢啲前英超兵，上季英冠就排第六名，喺升班附加賽四強合計1:2輸俾最終成功升班嘅富咸，睇吓今季打比改由林伯執韁繩，會唔會成功衝超啦，話晒佢哋近幾年已經三次喺升班附加賽輸波。
同期球星多執教鞭
喺英國球壇，踢而優則教嘅例子大把，前曼聯翼鋒傑斯已經做咗威爾斯主帥，今場亦都有入場睇波，睇吓打比嘅利物浦借將哈利威爾遜表現咁。至於「雙特」之一嘅謝拉特，今季開始執教蘇超嘅格拉斯哥流浪，球隊喺季初四場正式賽事兩勝兩和只失一球，亦都喺歐霸外連過兩關，謝四的領隊生涯算是有一個好開始，而格流會喺今晚蘇超首輪作客上季亞軍鴨巴甸。