前利物浦隊長謝拉特自從做咗蘇超格拉斯哥流浪嘅領隊後，就一直向紅軍球員埋手，成績亦都唔錯，仲殺入咗歐霸外第三圈。禮拜四晚嘅次圈賽事，格流主場同克羅地亞球會奧斯積克打成1:1平手，不過由於首回合作客以一球小勝，所以總比數贏2:1晉級，呢一場比賽亦係神奇隊長執教以嚟，第一場失球嘅正式比賽。
首次領格流失波
喺謝拉特帶領下，格流喺歐霸外圍賽首圈以不失一球嘅姿態晉級，次圈首回合作客奧斯積克亦都以一球小勝。今場次回合賽事，兩軍上半場互無交收，主場出擊嘅格流到53分鐘先由後衞卡迪開紀錄。眼見格流可以保持連續四場正式賽事不失球之際，客隊就憑一個烏龍波追平，巴列錫射門省中格流後衞高臣入網，最終打成1:1平手。
般尼大炒鴨巴甸
其實喺開賽之前發生咗一件唔愉快事件，雙方球迷發生大規模衝突，當中有兩名男士畀人拮傷。格流晉級之後，歐霸外第三圈將會面對斯洛文尼亞球隊馬里博爾，首回合定喺八月九號進行。另英超球會般尼亦都過關，同日喺次圈次回合，戰至加時後喺主場以3:1擊敗蘇超球隊鴨巴甸，兩回合計贏4:2，晉級第三圈。