有錢就是任性！但有幾多女人捨得畫花自己的Hermès Birkin？香港珠寶設計師邱李茂琪，早前將人生第一個Hermès Birkin拿去紐約，花了幾十美元請塗鴉學生畫花上色，不是要令手袋增值，「因為我要去學佢點畫手袋，唯一方法就係拎自己個袋去睇佢畫。佢拎支粗筆畫上去時，我真係面都青埋。」本身是油畫藝術家，邱李茂琪買定帆布手袋練習，未來準備將幾十個Hermès手袋逐一加工。
採訪：林妙萍
攝影：周樂恒
將Birkin塗鴉、改頭換面的Defacing Birkin熱潮，其實最早可以數到2013年、2014年。當時Kanye West為了送一份特別的聖誕禮物給Kim Kardashian，請了美國當代藝術家George Condo將一個卡其色Birkin畫了裸女油畫做禮物。本身是油畫藝術家、溥儀眼鏡老闆娘的邱李茂琪，多年來儲了大批Hermès手袋，今年忽發奇想為自己的愛藏手袋加入個人特色，就是加工。
乍見落筆臉青
第一步，邱李茂琪先去偷師學習，於是拿了人生第一個米白色Birkin去紐約，請graffiti artist加工，「第一個Birkin最有價值，我唔會丟掉但又唔會再用，不如拎去做實驗品。我拎去時好緊張，唔知會喊住走，定笑住走。」藝術家只問了她不想畫甚麼，就開筆畫畫，「佢第一下，係一支黑筆，仲要粗筆，一筆咁畫過去，我即刻話要出去飲杯咖啡，因為我已經有少少面青，哈哈。」
邱李茂琪是首位在維也納皇宮開畫展的華人，她慶幸對方很肯分享在Birkin上畫畫的技巧，「佢話係冇得起稿，啲打影要打得多啲，咁2D嘢就會立體啲。同埋acrylic colours比較鮮，上兩層但乾得好快，同我平日畫油畫要等十日八日先乾好唔同，仲有落筆嘅力度、方向，以及手袋嘅皮紋都會有好大影響。」她買了大批不同皮革布料作練字，更買了日本製款式、近似Birkin的帆布袋練習，畫完又釘窩釘，「希望將來畫真Birkin時冇咁驚，同時可以將自己嘅手袋加入少少touch，覺得會幾特別。」
獲停產Kelly Doll
至於逢女人都愛的Hermès，是從何時開始迷上？「二十幾歲開始儲，開頭覺得好貴好貴，但如果係保值就值得買，同埋真係long lasting。細個時真係有乜嘢色都要嗰種，係儲顏色，後來就儲得精啲。」2008年邱李茂琪將儲起了的二十多個Hermès畫了一幅油畫，之後就開始「儲精啲」之路，改儲特別版，如2010年限量版全黑連黑釦So Black鱷魚皮Kelly、個人特別訂製的粉紅拼色、長帶Kelly等，更成功令Hermès為她重做一個停產多年的Kelly Doll，「我幅畫就係爭一個Kelly Doll，佢哋最終肯重新做一個畀我，仲用番十幾年前張單嘅價值，好平。」
珠寶品牌實際
「珠寶係你可以買，可以唔賣，但係functional啲嘅，就可以日日戴。」邱李茂琪深諳有錢人的喜好，旗下品牌MARET主攻獨特的珠寶，如白金鑽石iWatch手帶、玫瑰金Apple AirPods等一類，她的作品不是只有金銀堆砌、炫富奢華，作品多次入圍設計界的奧斯卡Red Dot Design Award大獎，證明有創意也有市場。
「好似呢副白金老花放大鏡，係我發現身邊好多人唔想戴老花鏡，包括我自己，但如果可以襯得靚啲，就唔會咁抗拒，我覺得呢個市場好大，亦冇乜人做。」至於和Apple有關的珠寶，就更加要緊貼市場。
Kim Kardashian撥火加熱
Kim Kardashian在2013年的聖誕禮物Birkin，經George Condo加持，當年即升上4萬美金（約31萬2千港元），事實Lady GaGa 2010年時叫日本粉絲幫她的白色Birkin寫日文，已引起話題，經Kim一玩，這個潮人明星玩意不斷發酵，Rita Ora也加入行列找街頭畫師塗鴉Birkin。不過也有人覺得，破壞Birkin太暴發戶作風。
