Ronald Knox（1888-1957）的Ten Commandments of Detection寫給作家；我的寫給讀者尤其我自己，頗為偏激，但誡命就是誡命，不多解釋：
一，推理小說沒中國的事，源流在歐美，後起之秀是日本，即只能讀翻譯，台灣人心繫東瀛，譯筆保持神韻，大陸出版商老翻成簡體字本，嬲到東野圭吾一度暫停中文版權。
二，以本格為正宗，變格係搵老襯，例如三津田信三寫得通就叫本格，寫唔通就訴諸鬼怪自圓其說，美其名曰變格，所以要先睇簡介免中伏。
三，唔講感情。滲入愛情往往因為橋段不夠充撐；又有所謂社會派悲天憫人，森村誠一某名著結局竟靠感動兇手自行招供，咁都算推理？
四，唔睇女作家（sorry Agatha），至少日本如是，宮部美幸名大於實，可能女人比較感性，容易出現誡命三的問題。
五，唔睇警察做主角，那勢必牽涉科學鑑證，一般人怎懂？即係有佢講冇你講。上述Ronald Knox一早告誡作家別寫專業技術的東西，違背公平猜謎精神；我則站在讀者立場溫提，同理，別看法醫做主角的。
六，舊不如新。你想起福爾摩斯？你倒重讀試試？推理小說永遠後來居上，尤其經典屢遭無良者挪用、抄襲，如今回看變得不值一哂。民智漸開，為何不在現場卻聽到死者說話？詭計是錄音機！留意番著於咸豐年份，當時人的確估唔到喎，噴不噴血？
七，對作家本身，則新不如舊。推理小說是高消耗品，詭計不准重用，一個人想象力畢竟有限，在日本，諗到一條驚世駭俗的便參賽江戶川亂步獎出道，再來幾篇佳作站穩陣腳，之後通常食老本。識睇一定睇處女作，正如生過太多蛋的雞，肉質會漸差。
八，詭計既如此珍貴，當然用在長篇才合乎經濟效益，明乎此，讀者可忽略短篇。
九，別以為睇過影視版等如睇過，推理精妙盡在文字，因為細緻，搬上屏幕難免庸俗化。為取悅家庭觀眾，福山雅治演的伽利略系列，竟將搭檔改成異性，談情多過說案。
十，本人謹此宣誓，不洩密。篤爆謎底比一般劇透行為更缺德，請自行睇書。由此引申，也拒絕支持抄橋作品，例如某「以爺爺之名」的漫畫和播極「仍是」偵緝的檔案。