鷹君羅氏家族近日爆出爭產風波，身為羅鷹石四子、有「上海姑爺」之稱嘅羅康瑞，近日以貿發局主席身份接受港台節目《與CEO對話》訪問，憶述爸爸羅鷹石對自己影響深遠，由身教至言教都令佢學識克勤克儉，又披露當年幫爸爸公司打工只係得800蚊月薪，仲要兩年冇人工加。
羅康瑞話呀，當年爸爸送佢去澳洲留學，只准佢搭要成十幾日嘅船而唔係飛機去澳洲。留學頭兩年佢努力讀書，但第三年開始鬆懈，爸爸一早畀咗佢成年嘅學費同生活費，點知佢晚晚去唐人街食消夜，又俾附近賭場吸引，將所有錢輸清光，只好去酒店廚房打工，「我當時完全明白何謂手停口停，因為如果一日唔做嘢，晚上就冇飯食」。
返港後喺爸爸公司打工，佢話月薪得800蚊，兩年冇人工加，原來係父親刻意安排。年少氣盛嘅佢想另謀高就，阿媽就勸爸爸借錢畀阿仔創業，羅康瑞引述當時爸爸唔睇好自己，最後阿媽同爸爸「談判」多時，先成功勸服爸爸借十萬蚊畀當時年僅23歲嘅佢創業，成立瑞安建築公司。詳細節目訪問後日下晝2至4點喺港台第一台播出。
李八方