九龍西立法會補選仲有一排先舉行，劉小麗已成日拍住李卓人落區宣傳，實行Plan A同Plan B一齊打仗，咁對家建制派又點呢？有傳建制派想食物及衞生局前局長高永文去馬，亦有傳當年佢嘅政治助理陳凱欣亦係人選，噚晚有報道話高永文自言去馬機會不大，加上新民黨主席葉劉淑儀暗撐陳凱欣出選，似乎陳凱欣代表建制出戰並非空穴來風，隨時成為黑馬。
葉劉出po力撐
有線新聞噚晚報道高永文接受香港國際財經台訪問，提及好多朋友鼓勵佢參加補選，但佢想專注醫生工作，相信參選機會唔大，仍然未有最後決定。
有政界中人話，日前有報道話建制派想撐高永文前政助陳凱欣選，當時陳凱欣就話要等高永文有決定佢先會諗，𠵱家高永文暗示去馬機會不大，即係陳凱欣出選又少咗一層考慮。
葉劉噚晚亦喺facebook發帖，大讚陳凱欣做高永文政治助理時積極又有親和力，希望佢可以秉承民望高熱心服務香港嘅精神，為社會作出更多貢獻，喺更大層面服務市民：「假如她願意進一步服務香港，為民請命，我必定鼎力相助，全力支持。」咁嘅時機之下意有所指，似乎葉劉都力撐陳凱欣出戰補選噃！
李八方