早排歌手容祖兒喺一個廣告翻唱影帝古天樂經典歌《今期流行》嘅新版本，古仔當年喺《今期流行》MV入邊跳嘅「拜神舞」，亦因為咁再次炒熱，成為網民熱話，一向以貼地見稱嘅天文台facebook專頁不甘後人，前日發帖惡搞堪稱古仔黑歷史嘅拜神舞，滿足網民願望。
卡通紫外妹妹跳拜神舞
今次跳拜神舞嘅主角係天文台「天氣家族」卡通入面嘅紫外妹妹，天氣家族係2001年一項公開比賽嘅冠軍作品，成員代表唔同天氣情況，有見近日紫外線指數高企，紫外妹妹前日就喺天文台fb亮相，大跳古仔嘅拜神舞，帖文話「今期流行仲唔係本妹妹？近排天氣酷熱，加上紫外線橫行，戶外活動前，記得去啱啱變咗身嘅天文台紫外線資訊網頁睇睇先」，網民好受落，有人留言話「可唔可以叫古仔回應粉絲訴求？嚴重傷害香港人感情！」又有網民話「叫古仔報天氣」，而天文台fb專頁編輯就抽水話古天樂再跳拜神舞係全港樂迷共同願望。
李八方