全球最高身價嘅門將艾利臣比加，今夏加盟利物浦後終於喺周二首度跟隨球隊操練，佢更加一嚟到就話畀大家聽，自己係真材實料，喺操練中交出神救，睇嚟紅軍冇買錯人，我求大俠覺得下季最後一關，應該可以放下心頭大石。
睇完紅軍上季賞心悅目嘅演出，可能都會覺得呢支歐聯亞軍萬事俱備，全隊就係欠一個好門將，否則可能成績更佳，唔會出現卡利奧斯上屆喺歐聯決賽嘅蝦碌神作。結果，紅軍今夏就用咗6,680萬鎊嘅天價，從羅馬簽入艾利臣，用意都好明顯。
反應快擋出隊友近射
呢位巴西國家隊一號門神放完世盃假後，周二正式同大軍會合，喺法國嘅基地隨隊進行首課操練，唔知係咪知道好多鏡頭聚焦佢身上，佢喺操練度都份外落力，表現有板有眼，仲即刻整球神救畀大家歡呼吓，反應超快擋出隊友嘅近門施射。呢個片段令利物浦球迷歡喜若狂，亦喺各個利物浦嘅球迷專頁中瘋傳，相信佢哋都對呢名新門將非常期待。
完成操練後，艾利臣都有接受利記官網嘅訪問，佢話：「雖然兩個星期唔算長，但都有足夠時間畀我準備好第一場英超比賽，我相信喺開咧時會有100%狀態。」25歲嘅佢之後仲賣口乖咁話：「我好期待英超嘅挑戰，今日雖然只係第一日練習，但呢度已經令我有家嘅感覺。透過操練，我了解咗球隊同隊友嘅踢法，希望日後能帶俾球隊更多貢獻。」
都唔使求大俠講，艾利臣新球季都幾肯定會取代持續唔生性嘅卡利奧斯，成為利物浦正選門將。至於可能淪為三號門將嘅米洛列特，都九成機會會走人，之前傳可能去土超嘅比錫達斯，但家陣就傳西甲巴塞隆拿都想爭佢，只係如果佢去巴塞，睇怕都係做達史特根嘅後備。
阿諾特放完假歸隊
另外，除咗艾利臣返嚟報到，另一位巴西國腳羅拔圖法明奴同英格蘭國腳阿歷山大阿諾特，亦已經返歸，即係話只差克羅地亞中堅洛夫雲同球隊隊長佐敦軒達臣，球隊就完全齊腳。利物浦家陣會喺法國紮營五日，然後就會飛去都柏林同拿玻里踢另一場友賽，繼續備戰新球季。
