今夏由皇家馬德里轉投祖雲達斯嘅基斯坦奴朗拿度（C朗），繼禮拜一接受季前體測再同新隊友打吓招呼之後，禮拜二亦都終於進行咗第一課嘅操練，佢更加大顯實力，喺門楣挑戰度射贏幾位新隊友，仲要高舉雙手擺埋個勝利手勢出嚟。
話說祖記就仲喺美國集訓緊，不過部份世盃踢到入淘汰賽嘅球員就唔使過去，好似保羅戴巴拿、古達度、杜格拉斯哥斯達同賓坦古亞等都留喺都靈，同C朗一齊操練。祖記喺球會官方頻道度就上載咗佢哋操練嘅片段上網，可以睇到C朗跑緊步都不忘向鏡頭展露笑容同雙手豎起拇指，充滿巨星風範。之後就開始射門楣挑戰喇，古達度射兩次都挑戰失敗，希古恩同賓坦古亞同樣都射唔中，反觀C朗輕輕鬆鬆就射中條楣，再用個膊頭撞番個波入網，夠晒cool！