早前因勞工組疑似勞資糾紛導致5名執委集體辭任、幾十人拉隊退會嘅街工，原來本月中（22號）已經低調進行補選，除咗近年屢成戰靶嘅梁耀忠，連同另一上屆執委陳瑞銘繼續留任之外，不少資深會員甚至元老級都再次出山「救亡」，包括創會第一個職員蘇耀昌、94年開始擔任葵青區區議員嘅梁志成等，但主席一職就由13年加入、前年曾參與嶺大圍堵校董事件的25歲盧藝賢（圖）擔任。
今次街工大地震，蘇耀昌指退會嘅大多係近年加入的新人，但新任主席盧藝賢強調目前剩番嘅40幾人之中，三分一都係35歲以下，「青黃不接就絕對唔係」，目前最重要係協助街工重整旗鼓，「我哋從來都係勞工團體，扎根係社區，三十年都冇變過」，蘇又強調至今都冇解僱旺角勞工組三名成員，但已去信對方，希望對方若未能達致自負盈虧，就遷回葵芳，以節省資源，仲等緊對方回覆。