尖沙嘴天星碼頭不時會有白鴿出現，林太星期一（7月30日）下晝4點幾，去天星碼頭巴士總站搭車，見到一個女人戴住紅色口罩，企喺欄杆外行人路介乎馬路邊餵白鴿，引嚟為數近百隻白鴿飛嚟。
羽毛飄揚恐影響衞生
林太覺得咁樣餵鴿唔係幾好，唔知雀鳥嘅糞便會唔會帶菌，拍翼嘅時候羽毛隨處飄揚，令人不安。林太話覺得個口罩女人有備而嚟，先後餵咗幾次，而嗰度一向都有好多巿民同遊客，驚危及眾人安全，而且佢引咗一大群白鴿堆喺馬路邊，有巴士轉彎埋站嗰時，車長都要就住。林太希望相關政府部門關注一下。
據了解，食環署喺今年第二季開始已喺部份非法棄置垃圾黑點安裝網絡攝錄機，當中包括餵飼野鳥嘅黑點。此外，食環署舊年設立咗六支專責執法小隊，主要負責加強對違反公眾地方潔淨罪行，包括餵飼雀鳥整污糟公眾地方嘅人士採取執法行動，下個年度亦會增設專責執法小隊。
現時本港冇法律規管餵飼雀鳥，不過若果公眾人士餵飼雀鳥而整污糟公眾地方，例如留低啲殘餘飼料喺地下，會違反《公眾潔淨及防止妨擾規例》（第132BK章）第4（1）條，食環署執法人員可向有關人士採取執法行動。
