有傳新民黨立法會議員容海恩（恩恩豬）奉子成婚，最快下月同新民黨政策總裁袁彌昌拉埋天窗。消息爆出後，恩恩豬噚日終於現身見記者，不過佢師傅葉劉淑儀幫手擋駕，所有私人問題一概唔答，但就大談用高科技幫單親家庭更易取得贍養費！不過大家始終關心恩恩豬係咪有咗，同埋佢一旦成為第一個任內產子議員，立法會大樓又有冇「媽媽友善」設施畀佢用？原來大樓早已有呢啲設施，甚至有地方畀媽媽泵奶，不過好多人估唔到係EQ葛珮帆幾年前爭取返嚟嘅。
準新娘關心單親家庭
因為立法會成日有公眾參觀，所以即使冇女議員任內有生仔，大樓內亦有唔少「媽媽友善」設施，當中更加有哺乳室，入面仲裝晒拉簾增加泵奶時嘅私隱，又有電掣等媽媽可以為泵奶器叉電，不過原來呢啲設施，係幾年前EQ葛珮帆爭取嘅成果。
八方噚日就再問EQ會唔會再爭取媽媽友善設施，EQ話如果有同事真係大肚，就真係要爭取吓喇（嗱！佢冇點名話邊個㗎）。佢覺得目前只有一個哺乳室唔夠用，有必要喺其他樓層加多幾個，又建議行管會討論一下議員「坐月」時嘅特別投票安排，等在職議員媽媽都可以履行責任參與議政咁話。
至於噚日恩恩豬同師傅葉劉及黨友就《施政報告》諮詢同特首林鄭月娥會面，佢以黑衫遮肚十問九唔應，問到幾時會請假預產，佢又話冇啊，冇假啊，𠵱家放暑假囉！之後就急急跳上私家車走人喇。咁佢向娥特表達乜嘢意見？恩恩豬話會上要求政府擴大長者兩元乘車優惠、仲提出使用科技發展科技法庭，包括係家事法庭透過大數據分析，協助單親家庭更易取得贍養費等，但就無提及有關侍產假嘅問題。
李八方
