政制及內地事務局前局長、港區全國人大代表譚志源今年6月離任新風醫療副主席同新風教育主席之後，一直冇講佢轉職邊間大機構，只話過唔係政府機構、亦唔係上巿公司，到咗噚日終於揭開謎底！原來佢轉去馬會做高層，有馬圈中人估計，今次馬會搵譚志源過檔，可能同今個月中開檔嘅從化馬匹訓練中心有關。
馬會噚日宣佈委任譚志源做公司事務執行總監一職，於8月15日履新，佢亦會成為馬會管理委員會成員，直接向行政總裁負責，馬會話譚將同管理層合作，加強馬會策略性發展，鞏固作為世界級賽馬同慈善機構地位。有馬圈中人話，馬會轄下從化馬匹訓練中心剛好係8月28日開業，譚志源做官時候成日同內地官方交手，今次馬會睇中佢，或者想用佢嘅經驗，協助該中心管理同營運。