彷彿成為內地自由行旅客天下嘅彌敦道，充斥藥房、金舖、珠寶首飾店，昔日面貌究竟係點？政府檔案處噚日上載咗70張1970年代中期彌敦道嘅建築物同街景相片，同大家回顧香港歷史，當中包括彌敦道嘅香港上海匯豐銀行、循道衛理嘅九龍堂、1987年拆卸改建為逸東酒店嘅普慶戲院。
政府檔案處發言人話，希望呢輯照片喚起市民對彌敦道喺40多年前嘅集體回憶，透過呢批照片推動市民欣賞歷史檔案。呢批相點得嚟？原來由地政總署移交，當時係為咗記錄1970年代興建太子站至尖沙嘴站地下鐵路時建築工地嘅路面情況。檔案處喺新聞稿話：「當年一些地標建築物，以及那些越來越少人提起的家傳戶曉名字，如普慶戲院、『泰林』、『平霸』重現於這些照片。市民閱覽這些照片時可比較現時和1970年代彌敦道的經濟面貌。」