局長書展上發表「警察唔一定個個好人」後被定性為「人言可畏」兼「傷害信心」。局長惹毛了的，不是揸筆作家而係陀槍行家，「深感不安」，引起小市民共鳴。但不安之後，無晒下文。大老細一錘定音，評價呢件只係小事。老細唔撐，蓄意小事化無，局長深感對家那邊手臂延伸的壓力，點夠膽再為自己鳴冤，唯有日日潛水，希望呢，警方個乜乜協會唔似旺角行人專用區的噪音咁長命，嘈足十八年，「突破」李克強總理所謂的人類道德底線！發展局長唔一定個個都係林鄭，超打得先捱到十八年啊。局長深感不安，感覺頭上有把槍！感覺背脊有碌警棍！感覺政總周圍都係暗角！這種不安蔓延下去，局長，唔一定個個都係超人，人，係會崩潰，唔跳船恐怕就會跳樓！
有陰謀論指今次局長是刻意挑機，轉移市民對紅磡站剪筋、港珠澳橋人工島飄移、一地兩檢賣豬仔、土地大便論放生粉嶺高球場、社團條例政治解決……這些視線。再下來，製造搶疫苗南下大軍與市民的衝突，尖沙嘴港鐵大堂再直擊多幾坨內地小童大糞，fb洗版……
天星碼頭大媽大叔音照走，屁照扭。香港，唔一定個個xx。xx係乜，各自心中有數。