八月開始，除咗打入世界盃四強嘅球星外，大部份球員都已經歸隊。早前一直喺希臘同西班牙度假嘅美斯，噚日都同碧基、布斯基斯，同埋佐迪艾巴返到巴塞隆拿報到。更特別嘅係，美斯今季正式取代恩尼斯達成為新隊長。
取代小白坐正做隊長
美斯未有會合喺美國踢國冠盃嘅隊友，噚日就返到巴塞大本營報到同接受體檢，之後仲即刻開始新季嘅第一課操練。而西媒《世界體育報》嘅封面就用咗美斯着住巴塞波衫，戴隊長臂章嘅相做封面，仲寫住「美斯今天將回到球場，接替恩尼斯達，以第一隊長身份帶領巴塞前行。」
而早前美斯太太就喺ig上載咗段片，美斯度假時腳癮大發，同屋企隻波爾多獒犬Hulk玩吓波。雖然Hulk係隻寵物，企起身足足一個人咁高，但美斯一樣玩弄佢於股掌之中，見佢挑挑剔剔咁，好似已經將世盃16強出局嘅事忘記晒。
皇馬獲頒WWE金腰帶
新嘅一季，美斯除咗做隊長之外，仲要迎接沒有基斯坦奴朗拿度（C朗）的日子。事關死敵C朗已經轉投意甲祖雲達斯，周一佢都去到祖雲達斯嘅大本營，接受進一步嘅體測。同日現身嘅仲有保羅戴巴拿、古達度、杜格拉斯哥斯達，同埋賓坦古亞等踢完世界盃嘅球員，C朗亦逐個同佢哋打招呼㖭。
而C朗嘅前球會皇家馬德里，今日就喺邁阿密同曼聯上演國冠盃賽事，賽前就收到一條為咗慶祝佢哋成功連奪三屆歐聯冠軍嘅特製WWE金腰帶。向皇馬贈送金腰帶、曾經贏得多次WWE世界冠軍嘅摔角手Triple H事後就喺個人Twitter上載咗一張金腰帶相，仲留言話「連續贏得三屆歐聯冠軍之後，係時候畀皇馬好似WWE冠軍咁慶祝了」！
