由消委會、香港記者協會同香港攝影記者協會合辦嘅「第18屆消費權益報道獎」噚日舉行頒將禮，其中《蘋果》憑「銷售團隊神化精油 稱助贏馬醫百病」嘅報道，記者趙雅婷同陳沛冰獲得文字組別（調查報道）優異獎。另外憑「直擊元朗非法貨櫃屋村 揭港月產百個貨櫃式住宅」嘅報道，記者曾偉龍同鍾雅宜就獲得影像組別（短片）優異獎，亦是《蘋果》第一次喺消費權益頒獎禮入面奪得影像組別獎。
噚日消委會同時舉辦《選擇》月刊500期時間囊封存儀式，消委會將第100、200、300、400同500期《選擇》同各嘉賓對月刊嘅祝願放落時間囊，任頒獎嘉賓嘅商務及經濟發展局局展邱騰華除咗寫下祝願，亦特別將4月18號商經局發出嘅新聞稿放落去，原來佢想乘機hard sell有關針對美容同健身產品銷售設立冷靜期嘅建議，話希望今年內向立法會提交有關強制設立銷售合約冷靜期嘅法例草案，再展開公眾諮詢，期望可以盡快立法。