人大釋法後遭褫奪立法會議員身份的社民連「長毛」梁國雄，噚日現身立法會5樓會議室，交代遭行管會追討300萬元一事時，但八方估唔到立法會保安大為緊張，除咗多名保安主管現身會議室之外，仲罕有咁派保安全程喺記者會會場內睇實，啲保安會前更特登多次提醒長毛，喺負責租房的工黨立法會議員張超雄到場前，不能受訪。
其後張超雄到場後，長毛即略帶感慨話，好多謝張超雄令佢可以喺返佢原本享有責任同權力的地方開記招。長毛又話，成日都同張超雄講一個笑話，就係「兩雄相遇，多於一雙」，意即兩個人走埋一齊，效果係多過兩個人，長毛又多謝過去喺街上、面書或網上支持佢的巿民，「我多謝佢哋，佢哋對我的支持好寶貴，畀我知道人世間仲係有公義而唔係權力」。