今年政圈嘅喜事，莫過於盛傳有餡嘅新民黨副主席容海恩即將閃婚，下嫁同黨嘅政策總裁袁彌昌啦。八方收到風兼得到準新娘嘅證實，姊妹團成員之一就恩恩豬嘅議會同事、工聯會麥美娟（Alice）。Alice出咗名係剩女，唔知佢眼見恩恩豬快做新娘，又有冇啲想撒嬌呢？
Alice同恩恩豬雖然都係建制陣營，但份屬不同黨派，兩位點解變成姊妹？據聞早喺恩恩豬同袁彌昌嘅戀情曝光後，恩恩豬問過Alice，怕唔怕感情見光死嘅問題。當時Alice安撫恩恩豬話唔使驚，心裏面亦估到恩恩豬會快過自己出嫁，仲表明到時要做恩恩豬嘅姊妹。
或成首位任內懷孕女議員
果然Alice聽過太多恩恩豬嘅心事都好，都已經唔太重要。但唔知Alice又有冇諗過，終有一日佢嘅伴侶會專注對佢，每晚都固定安樂，即係俗語嘅開花結果呢？點知Alice斬釘截鐵咁話冇諗過會嫁得出，仲表示自己經已有一對「寶貝女」（唔好諗多咗，呢對只係狗女），完全係一副想專注工作嘅態度。
恩恩豬就話，到時佢會將個花球拋得好啲，又寄語最緊要都係搵到生活嘅快樂方式，一句講晒：開心就得嘞！恩恩豬又講得幾啱嘅，太過愛一個人，可能會逼到愛人變做朋友再變生疏。查實恩恩豬今次都係立法會創舉，係首位喺任內結婚嘅女議員，仲有可能係首位任內懷孕嘅女議員。
另一建制大黨、民建聯葛珮帆就表示，佢一見到新聞報道後就短信恭喜咗恩恩豬，只係恩恩豬半夜先覆佢多謝。葛珮帆仲話下次要話吓恩恩豬先得，事關大肚婆唔應該夜瞓喎。
李八方