噚日朝早9點幾，青葵公路出現公路「炸彈」，有架貨櫃拖架突然飛甩個孖轆出嚟，打中一架私家車，好彩冇人受傷。讀者葉小姐坐朋友架私家車沿青葵公路出九龍，去到瑪嘉烈醫院對開嗰時見到成個經過，個孖轆喺四條行車線嘅公路彈嚟彈去，有架客貨車扭軚避開咗，但係另一架私家車避唔到，畀孖轆打中後座左邊車身凹咗，司機慢慢揸到去慢線停車。
冇停車繼續行
個孖轆打中私家車之後亦都打橫跌咗喺路邊，而拖架司機似乎唔知道自己架車甩轆，冇停車繼續行。葉小姐講番當時路面不斷有車嚟到，避開孖轆嘅情況好似拍戲咁，好驚險。
警方話，之後已經聯絡到涉事嘅貨櫃拖架司機，喺葵涌6號貨櫃碼頭搵到佢同架車，調查緊事件。另外，俾孖轆打中架車嘅姓曾司機，事後喺現場協助警方調查，並且提供車cam片段。曾先生話每日都會揸車行青葵公路，第一次遇到咁嘅事，佢憶述當時行行吓車突然間有啲嘢撞過嚟，有避但避唔到。佢好慶幸冇受傷，稍後會向貨櫃拖架司機追討私家車嘅維修費。