黃子華昨晚在紅館舉行棟篤笑「金盆𠺘口」尾場，為其棟篤笑生涯畫上句號。昨晚吸引不少圈中人來捧場，包括佘詩曼、鄭裕玲、吳君如、陳可辛、古巨基、周慧敏、倪震、吳鎮宇、張達明、容祖兒、劉兆銘、黃秋生、陸永、C君及湯盈盈等。
子華甫出場，觀眾舉電話拍照，全場大叫回水及除褲，子華就說︰「係你哋最後嗌嘅機會，金盆𠺘口，係歇斯底里啲。」他更說︰「咁大鑊喇，即係所有笑話你哋都聽過啦。笑話唔同唱歌呀各位，大家記住，咁你要守嘅規律，就係我講完A，你唔好幫我講B喎，OK？因為你聽完A、B，你唔會笑㗎啦，聽過咁多次，但係你要有演技，你聽完A、B，跟住你都都笑唔出㗎啦，但係你都要做「HeHeHe」，嚟，一、二、三，嚟一次畀我睇。」全場即「HeHeHe」聲四起。
昨晚尾場觀眾情緒高漲，子華講七警時，全場反應甚大。子華拿起水杯飲水，台下又尖叫拍手，子華說：「𠵱家喺屋企飲水，阿媽都會拍手，平時仲偷偷睇我飲水。」接着子華講到中國內地其實是「唔收番香港住」，有部份觀眾拍手，子華就話中有話：「台下拍手嗰啲，都唔知係邊面，我真係好難做。」
採訪︰曹家誠
攝影︰陳俊強
