戰神又再發威！周日洛杉磯銀河對奧蘭多城嘅美職賽事，伊巴謙莫域獻出佢喺美職第一個帽子戲法，令主場嘅銀河喺三度落後下，以4:3反勝奧蘭多城。
今場比賽銀河對住聯賽作客七連敗嘅奧蘭多城，諗住贏波易過食菜，點知後防施安尼擺烏龍，令銀河上半場以1:2落後。換邊後，伊巴先喺47分鐘接應杜斯山度士左路傳中頂入追平，但奧蘭多城亦有當姆戴亞回敬一記頭槌再度領先。不過最大贏家始終係伊巴，67分鐘佢接應奧拿卡馬拉傳送插水式飛頂入網，幫銀河第三度追和，更喺四分鐘之後門前勁抽一腳入網，伊巴更加興奮到除衫慶祝，最後帶領銀河以4:3力克奧蘭多城。自從加盟銀河以嚟，佢上陣17場已經累積射入15球，認真強勁。