月初由皇家馬德里以一億歐元轉投意甲祖雲達斯嘅葡萄牙球星基斯坦奴朗拿度（C朗），星期日已經同家人抵達都靈，並且喺周一向球會報到兼開操，正式展開佢意甲生涯。結束休假嘅C朗，喺星期日傍晚已經同女友佐真娜同埋佢四位仔女坐私人飛機抵達都靈，當地傳媒仲影到佢落機嗰陣抱住佢嗰位由代母所生嘅龍鳳胎細仔Mateo落機。
無緣倒戈鬥皇馬
C朗今個夏天都相當忙碌，葡萄牙喺七月初嘅世界盃16強出局之後，C朗只係去咗希臘休息幾日，已經要處理轉會嘅事，之後佢又去咗中國為佢代言嘅運動品牌做宣傳，然後取消咗南韓同日本之行，上星期返到佢葡萄牙嘅屋企享受最後幾日假期。C朗上星期就喺社交網站Instagram度上載咗佢同佐真娜嘅合照，仲表示可以同最愛嘅人享受假期好開心咁話。
據悉C朗星期一就正式喺祖雲達斯新落成嘅訓練基地進行佢轉會後嘅首課操練，不過由於教練艾基利同大部份祖雲達斯球員𠵱家都喺美國參加緊國冠盃，而C朗亦唔會再飛到美國會合，所以佢將會錯過今個星期六對皇家馬德里嘅國冠盃比賽，無緣倒戈喇。
祖雲達斯8月8日就會返到意大利，到時C朗就會正式同「新老細」艾基利仲有一班新隊友見面。至於意甲賽會上星期亦都公佈咗今季嘅意甲比賽秩序，祖雲達斯嘅開鑼戰就會喺8月19日作客基爾禾，預料C朗到時就會地標上陣喇。同樣放完長假返到祖記嘅仲有保羅戴巴拿，不過佢早前同女友去海邊玩嘅時候，就被人影到身材走晒樣，成個肚腩仔出晒嚟，睇怕嚟緊都要向出晒名夠弗嘅C朗取吓經喇。
祖記望賣希古恩套現
C朗喺祖雲達斯將會同基迪拉同埋希古恩兩位前皇馬隊友故劍重逢，不過有傳祖記就想賣出希古恩套現幫補吓C朗嘅轉會費，所以希古恩可能同C朗打個招呼就要走人，據悉今季積極重組陣容嘅AC米蘭同車路士都有興趣羅致呢位30歲阿根廷射手，據意大利傳媒指祖記仲願意用希古恩交換上季先至離隊嘅中堅邦路斯再加2,000萬歐元現金㖭。
