阿仙奴嘅德國中場奧斯爾早前退出國家隊嘅風波餘波未了,喺星期日就有幾百位德國球迷聚集喺《圖片報》位於柏林嘅總部外示威(圖),抗議德國足總同部份國內傳媒針對奧斯爾。
自從奧斯爾同土耳其總統埃爾多安會面之後,一路受到部份德國足總高層同傳媒猛烈批評,世盃出局之後更嚴重,最終奧斯爾終於頂唔順,宣佈要退隊,仲大鬧批評者雙重標準。退隊之後,《圖片報》日前仲刊登咗前德國國腳波碧批評奧斯爾嘅訪問內容,令一班支持奧斯爾嘅球迷忍無可忍,紛紛着上奧斯爾嘅波衫上街示威,仲揮動土耳其國旗,高叫「我係奧斯爾」嘅口號支持「大眼仔」。