特朗普上台後，世界局勢變個不停，股市匯市也因此上落不定，凡有此情況，交易員最開心，因為呢個鐘頭話睇好，人人long，點知特朗普突然出個Tweet，人人急忙轉short，交易員只賺佣金的，點會唔笑口常開吖，理得邊個蝕本斬倉喎，總之有成交最緊要。但如果交易員自己坐盤，隨時左一巴右一巴，到天光就會畀老闆炒魷都唔定。
上星期四凌晨一點左右，道瓊斯指數仍然在跌，點知到咗兩點就突然轉升，不久就有消息話特朗普與歐盟委員會主席容克達成貿易談判協議，於是三點幾鐘，道指就如90度角直線上升，收市升咗172點。在香港炒美國藍籌股，偶然眼瞓一陣都唔掂。
容克究竟與特朗普達成甚麼協議？星期四凌晨四點幾（美國東岸時間下午四點幾，紐約收市後），呢兩位仁兄一齊在白宮玫瑰園見記者，特朗普講到好似係美國大勝利，其實後來睇清楚，正如CNN所寫，只係雙方同意：TO MAKE ANOTHER DEAL，雙方只係暫時擱置汽車關稅唔講，集中焦點講特朗普口中唸唸有詞嘅三無或三零貿易，即係零關稅、零貿易障礙、零政府補貼。如果最後美歐真係有一份全自由貿易（三零）協議，就會係世界奇蹟，係世界貿易史上前所未有之大事。但歐盟有28個國家，經濟利益並不統一，一講到完全開放農產品市場，任美國農產品以零關稅入口喎，法國農民會係第一個包圍巴黎，在街上倒牛奶，打開雞籠放雞亂走。法國總統馬克龍在7月27日就發表聲明，反對「三無」談判，歐盟每年買怕農民，給予特別補貼，點可以做到零津貼呀，容克其實心知肚明，不過佢見特朗普之主要目的係希望美國不向歐洲車徵收25%關稅，如果話雙方一開始談判「三無」，汽車關稅即時停擺嘅話，容克目的已達，特朗普則可以大吹大擂話歐洲願意跟佢嘅「三無方向」開步走，真正係各取所需，其實乜都冇發生過，只係維持現狀不變，投資者已經歡喜若狂。
特朗普見容克之時，佢嘅前私人法律顧問Michael Cohen（科恩）與佢正式決裂，科恩嘅辯護律師直情送秘密錄音帶（特朗普與科恩秘密私人講話）上CNN爆料，揭穿特朗普講大話。科恩秘密錄音當然違反律師之專業道德，但到咗拚死無大害之時一於攬炒啦；特朗普勃然大怒之餘，當然有心理壓力，急急與容克達成「同意再談判」之協議，以及宣佈延遲邀請普京訪美，相信係為勢所逼，暫時脫離美歐、美俄戰線，少咗兩層顧慮先，仲有其他硬仗等住嚟！